Кенді атырап арқа төрінде «Қасым» әдеби-қоғамдық журналы ұжымының ұйымдастыруымен шағын футболдан тұңғыш рет «Қасым» кубогі сарапқа салынды. Дүбірлі доданы қабылдаған Е.А.Бөкетов атындағы Қарағанды мемлекетттік университетінің үлкен спорт залында бұл күні ақында, жазушы да, әнші де, актерде шағын футболдан доп тепті. Жанкүйер болып келген жұрттың қарасы да көп болды. «Қасым» әдеби-қоғамдық журналының бас редакторы, жазушы Серік Сағынтай бастаған арқаның қаламгерлері мен өнерлі серілері бастамасымен өткен доп додасы Көкпекті ауылында опат болған марқұмдарды бір минут үнсіздікпен еске алумен басталды.
Биыл тұңғыш рет өткізіліп отырған турнирдің өзіндік айырмашылғы мен қызықты жайттары да болды. Олай дейтініміз көмірлі өңір Қарағанды мен Елордамыз Астана шаһарларынан келген құрметті қонақтар қаламгерлер, ақын-жазушы, әнші, өнерпаздардан құралған қос қаланың 5 командасы қатысты. Жарысқа қатысушы құрметті қонақтар қатарында ақын, Мемлекеттік «Дарын» жастар сыйлығының иегері Қалқаман Сарин, Дәурен Берікқажы, айтыскер ақындар Серікзат Дүйсенғазин, Еркебұлан Қайназаров, жас ақындар Саян Есжан, Дастан Омаров. Ал, жарысқа қатысушы командаларды таныстырар болсақ, айтыскер ақындар мен жазба ақындардан құралған «Астана» және де жас ақын, әнші тамадалардан құралған «Жас тұлпар» командалары Елорда намысын қорғаса, арқаның азулы ақындары мен қаламгерлерінің «Арқа» командасы, жазушыақын, журналистерден құралған «Рух», әншілер мен тамадалардан жасақталған «Тұран» командалары кенді қаланың намысын қорғады.
Жарыс барысында байқағанымыз турнирге қатысушы қаламгерлер мен өнерпаздардың қызығушылығы мен табандылығы ерекше көрініп, болашақта қос қаламыздан ғана емес, республикамыздың төрт төңірегіндегі күллі облыстар мен қалалар түгел қатысатындығына зор сенім барлығын осының өзі ақ көрсетіп тастады. Тіпті алғашқы ойындағы ең тартысты өткен екі қаланың ақындарының арасындағы ойын көрермен делебесін қоздырып, жанкүйерлердің қошеметіне бөленді. Бұл ойында Елорданың «Астана» командасы мен арқаның «Арқа» командасы жан алысып, жан берісті. Жарыстың шымылдығын түрген де осы қос қоманда болатын. Алғашқы болып астаналықтар төртінші минутта есеп ашып, тұңғыш өткізіліп отырған жарыстың алғашқы голын соқты. Алайда «Арқа» командасы тегеурінді қарсылық көрсетіп, ойын теке-тіреспен жалғасты. Алғашқы тайм 3:2 есебімен жерлестеріміздің пайдасына аяқталып, үзілістен соң кездесу тағдыры шиеленісе түсті. Ойын соңына қарай «Арқа» командасы тізгінді нықтып ұстап, есепті еселеп 5:3 ке жеткізді. Бұл ойында сөзсіз жерлестеріміз жеңістің ауылында жақын тұрған. Алайда қазақ футболындағы соңғы сағат синдромы «Арқа» футболшыларына бағына орнады. Ойынның аяқталуына небәрі 3 минут қалғанда «Астана» командасы табандылық танытып, жауапсыз 3 гол соғып, қиын кездесуде жеңіске жетті. Басты қарсыластарынан 5:6 есебімен басым түскен «Астана» құрамасы одан кейінгі кездесулердің барлығында жеңіске жетіп, тұңғыш «Қасым» кубогін иеленді. Тек бірінші кездесуде сүрінген Арқаның азулы ақындарынан құралған «Арқа» командасы келесі ойындарыдың барлығында жеңістің биік шыңында көрініп, II орын иеленді. Тағы бір Елордалық ұжым «Жас тұлпар» командасы «Астана» мен «Арқадан» жеңіліс тауып, қалған ойындар да жеңілмеді. Осылайша «Қасым» кубогы жолындағы тартыстың қола жүлдесін еншілеріне жазды. Турнир барысында барлық командалар жақсы ойын өрнегін көрсетті. Әсіресе жоғарыдағы үздік үштіктің ойындары жанкүйерлердің қызығушылығын тудырды.
Жарыстың жеңімпаз командалары мен турнирдің үздіктерін, жарысты ұйымдасытырушы «Қасым» әдеби-қоғамдық журналының бас редакторы С.Сағынтай, әнші С.Аяған, ақын Р.Нұрбай марапаттады. Сонымен турнирдің үздіктері «Күркіреп күндей өтті ғой соғыс…» аталымы бойынша үздік қақпашы Сержан Мұсайын (Арқа), «Өзге емес, өзім айтам өз жайымда…» аталымы бойынша үздік бапкер Қалқаман Сарин (Астана), «Өртке тиген дауылдай…» аталымы бойынша үздік шабуылшы Айтбай Жұмағұлов (Арқа), «Жас дәурен ризамын мен саған…» аталымы әдемі гол авторы Дастан Омаров (Астана), «Шарлаған жолым жатыр жер бетінде…» аталымы үздік жартылай қорғаушы Қайнар Әлетаев (Жас тұлпар), «Қолымда найза, шағылып айға…» аталымы бойынша үздік қорғаушы Дәурен Берікқажы (Астана), «Мен қалған бір атаның ғасырымын…» аталымы үздік ойыншы Мейірлан Шакенов (Арқа), «Қиялым қақты қанат…» аталымы бойынша үздік жанкүйер Әйгерім Мақажанова, «Түсірген ой сәулесін шартарапқа…» аталымы үздік ұйымдастырушы Әсел Мұздыбай.
«Қасым» әдеи-қоғамдық журналының бас редакторы, бүгінгі жарыс қожайыны ақын Серік Сағынтай жарыс барысында айтқанындай осынау турнир бұдан былай қарай, жыл сайын, тіпті маусымдық кезеңдермен тұрақты өткізіп тұруы тиіс. Алдағы уақытта оған қатысуға тілек білдіруші ақын-жазушылар мен өнерпаздардың қатарын ұлғайтып, көптеп тартуға көңіл бөлетіндігенде баса атап өтті. Демек осындай үлгілі үрдіс, дәстүрлі турнир жалғасын таба беретіндігіне сенім зор.
Алтынбек Құмырзақұлы