Құрылтай аясында Елбасының «Қазақстан жолы – 2050: «Бір мақсат, бір мүдде, бір болашақ» атты Жолдауына арналған «дөңгелек үстел», «Сезім шуағы» сурет және кітап көрмесі, футбол турнирі, Ер Жәнібек батырдың 300 жылдығына арналған «Асық ату», қазақша күрес ойындары мен «Ана тілім – парызым» атты жас жеткіншектер арасындағы сайыс, сондай-ақ, «Алаш» азаматы, марқұм Мұстафа Шоқайдың зиратына бару жоспарланған. Аталмыш іске Берлиндегі қазақ қоғамының басшысы Бешіретхан Малабахан мен Германиядағы Қазақстан елшілігі ат салысуда.
Қазақстан делегациясын Дүниежүзі қазақтарының қауымдастығы Төрағасының бірінші орынбасары Талғат Асылұлы Мамашев басқарып барады. Делегация құрамында М.О.Әуезов атындағы Әдебиет және өнер институтының директоры, тарих ғылымдарының докторы Уәлихан Қалижанов, Мемлекеттік сыйлықтың иегері Әлібек Асқар, Қазақстанның халық әртісі Мақпал Жүнісова, Ер Жәнібек қорының президенті, медицина ғылымдарының докторы Махсұт Темірбаев, «СК-Астана» коперативтік қор директорының орынбасары Әсел Шілдебаева, «Дарын» жастар сыйлығының иегері, суретші Гүлназым Өмірзақ, «Серілер» тобы, «КТК» телеарнасының тілшісі Гүлмира Әбіқаева, т.б. өнер және қоғам қайраткерлері бар. Және де Құрылтайға Еуропаның оннан астам елінен, АҚШ, Түркиядан қазақтар келіп қатысады.
Құрылтайдың Бас демеушісі – «Самұрық-Қазына» ӘАҚ.
Алыстағы ағайынға рухани, мәдени қолдау көрсету Қауымдастықтың негізгі міндеттерінің бірі. Ендеше, Құрылтайға сәттілік тілейік, ағайын!
Ботагөз УАТҚАН
