Сұрақты осылай төтесінен қойып отырған себебіміз мынау: Қазақттың “қайтқан малдан қайыр бар» деген аталы сөзі тағы да расқа шықты. Басқа, басқа емес, ел етегінен ұстаған, сенім артқан мәжіліс депутаттары сенаттан қайта оралған “Еңбек мигранттарына” қатысты заң жобасын сол қалпында мақұлдай салды. Сөйтіп өздерінің жылы орнын сақтап қалды. Егер мәжілісмендер жоғары палатамен үзілді-кесілді келіспей қалса, заң бойынша, президент не сенатты, не мәжілісті таратып жіберер еді. Осыны бек түсінген мәжілісмендер сенатпен ым-жымдарының бір екенін танытып, миығынан күліп отыр. Енді шет елден келген қандастарымызға 5 жыл емес төрт-ақ жылда Қазақстан Республикасының азаматтығы берілсін деген шешімге әрі төре әрі төбе билер бір ауыздан келісіп отыр. Ал алыс-жақын шет елдерден, ел мен жерін, отанын шын аңсап зорға жеткен бауырларымызды төрт-ақ жыл бойы қаламынан қатырып қаңтарып қоймақ. Әуелі 5 жыл деп еді, кейін айнып, «рақымшылдық жасап» 4 жылға шегеріпті. Не деген «жомарттық», не деген «кең пейіл», неткен «отаншыл-ұлтшылдық» деңізші?! Бұндай депутаттардан «айналып кетейін» демеске лажың бар ма? Мұндай «милы, математик, зерделі, дархан» депутаттар біздің парламентте ғана бар шығар. Бұқым, табаны күректей бес жылды тұтамдай төрт жылға шолтитқанына қалай ырза болмайсың! Тісіңді қайрап, тіліңді тістеп тұрып «ризалығыңды» айтуға адам аппайсың-ау.
Жалпы, шет жұртта, алып державалардың жер бөлісу кезінде атамекен, қора-қопсысымен, басқаның бодауында кеткен, одан қалды қасыретті қанды жылдарда қуғын-сүргін көріп бөтен елді паналауға мәжбүр болған қандастарымыздың Жапандағы Жалғызы – Ұлы Отанына оралуына зор мүмкіндік берген, бұндай шешімді Қазақ Елінің Тәуелсіздікке қолы енді жеткен аса ауыр кезеңінде батырлықпен қабылдаған Елбасы, Тұңғыш Президентіміз, Ғасыр Ғұламасы Нұрсұлтан Әбішұлы Назарбаев еді! Елбасының «Құйылсын көшің, Жиылсын есің!» деген Ұлы Сөзі Отаным деген әр қазақтың жүрегінен өшпестей орын алғаны қашан. Презинтеміз қазақтың басын қосумен түн ұйқысын төрт бөліп жүрсе, мемлекеттің парламентінен орын алған депутаттардың мына әрекеті Елбасының ұстанған саясатына көпе-көрнеу қарсы келгендік емес пе?
Тұңғыш Президентіміз Нұрсұлтан Әбішұлы ел парламентарилерінің бұндай жөнсіз, қисынсыз, қисық басқан қадамына жол бермейтіндігіне қазақ халқы кәміл сенеді.
Б.Бақытбек