30 сәуірде елордада «Домбыра-дастан» атты ІІ қалалық домбырашылар байқауы өткізіледі. Қазақстан халқының бірлігі күніне орайластырылған шараға өзге ұлт өкілдерінің балалары қатысады. Бұл туралы astana.kz сайтына қалалық Білім басқармасынан хабарлады.
Байқаудың негізгі мақсаты — оқушылардың музыкалық-әсемдік тәрбиесін жетілдіру, орындаушылық шеберлігін арттыру, неғұрлым қабілетті, кәсіби келешегі бар оқушыларды айқындау, өзге ұлт өкілдері балаларының арасында қазақтың ұлттық домбырасын насихаттау арқылы өнерлерін дамыту болып табылады.
Байқауға қатысуға Астана қаласы жалпы білім беретін мектептерінің 10-14 жастағы өзге ұлт өкіл оқушыларынан 15 талапкер өтініш берді. Байқаудың шарттары бойынша әр мектептен «дәстүрлі ән» және «қазақ күйі» аталымдары бойынша 2 оқушы ғана қатыса алады.
Қазылар алқасы қатысушыларды байқау талапкерлерін шығарманы орындау шеберлігінің сапасы, сахна мәдениеті, сахналық киім үлгісі сияқты критерийлер бойынша бағалайды.
astana.gov.kz