Аса құрметті Нұрсұлтан Әбішұлы!
Қазақ оқырмандарының тарихи танымын кеңейтіп, ұлттық санасын дамытуға сүбелі үлес қосып келе жатқан, адамзат тарихында өшпес із қалдырған ірі тұлғалардың бет-бейнесін кәсіби ғалымдардың, саясатшылардың, қоғам қайраткерлерінің сараптамалары арқылы анық та шынайы, жан-жақты көрсету арқылы жас ұрпақты отаншылдық, мемлекетшілдік рухта тәрбиелейтін «Жұлдыздар отбасы АҢЫЗ АДАМ» журналына қазір, өкінішке орай, жойқын ақпараттық шабуыл басталды. Оның мақсаты – аталмыш журналды «Гитлерді, фашизмді дәріптеді» деген желеумен жаптыру, ал, оның бас редакторы Жарылқап Қалыбайды «әлеуметтік және ұлтаралық араздық тудырды» деген айыппен «қылмыскер» ету.
Ал, шын мәнінде «Жұлдыздар отбасы АҢЫЗ АДАМ» журналы өзінің төрт жыл ішінде жарық көрген 92 санының бір де біреуінде, соның ішінде Екінші дүниежүзілік соғыстың ұйытқысы және бас қылмыскері болып табылатын Адольф Гитлердің өмірі мен зұлымдық істерін әшкерелеуге арналған соңғы санында да ешқандай заң талаптарын бұзатын материалдар жариялаған емес.
Осыған орай өзіне еріксіз назар аударатын жағдай – ондаған миллион бейкүнә кеңес адамдарының қазасын мойнына жүктеген Иосиф Сталин немесе қолдан жасалған жаппай ашаршылықпен қазақ халқының жартысынан астамын қырғынға ұшыратқан Филипп Голощекин сияқты жауыздар туралы кезінде осы журналдың арнайы сандары шыққанда ешқандай пікір білдірмеген орыстілді сайттар, ақпарат агенттіктері мен КТК сияқты телеарналар бүгін шоқ басқандай шоршып түсіп, «Жұлдыздар отбасы АҢЫЗ АДАМ» журналы «фашизмді насихаттады, Гитлерді дәріптеді»-міс деген жалған ақпарат тарату арқылы ел ішін дүрліктіріп қана қоймай, ең бастысы, бұл дау-дамайға Ресей Федерациясын да араластырды, сөйтіп, екі ел арасында жанжал шығу қаупін туғызды, көрші елдің тәуелсіз Қазақстанның ішкі істеріне орынсыз қол сұғуына себепкер болды және бұл келеңсіздікті журналға саяси қысым көрсету амалы ретінде пайдаланып қалуға тырысуда. Ал мұны біз, не жасыратыны бар, қазақтың ұлттық намысына тиетін жағдай деп есептейміз.
Мұндай іріткі салуға ерекше үлес қосқан – КТК телеарнасының 18 сәуір күнгі жаңалықтары мен 20 сәуірдегі «Портрет недели» апталық шолуы. КТК журналистері Ұлы Отан соғысы мен Ауған соғысының қазақша оқи алмайтын орыстілді ардагерлерін журналға қарсы айдап салды. Оған Алматы қаласы әкімдігінің ішкі саясат басқармасының жетекшісі қолдау көрсетіп, іле-шала наразылық акциясын ұйымдастыртып, телекамералар алдында журналды өртетті. ҚР Байланыс және ақпарат агенттігі, ҚР Сыртқы істер министрлігі, Алматы қаласының әкімдігі мәселенің анық-қанығына жетпей жатып, журналды айыптайтын асығыс мәлімдемелер жасау арқылы «кінәсіздік презумпциясын» өрескел бұзды. Ал, мұның барлығы аталмыш орындар алдағы уақытта өздерінің сол заңсыздықтарын қалай да ақтап алу үшін мемлекеттік сараптама қорытындысын әділ өткізбеуге тырысуы мүмкін деген күдік туғызады.
«Жұлдыздар отбасы АҢЫЗ АДАМ» журналының тұрақты оқырмандары ретінде біздер оның бұл санын түгел оқып шығып, ондағы материалдардың фашизмді насихаттауға емес, керісінше, Гитлердің адамзат баласына жасаған зұлымдығын әшкерелеуге арналғандығына анық көз жеткіздік. Олардың арасында тек пікір алуандығы үшін Гитлерді жақтайтын жалғыз адам – Нағашыбай Есмырзаның пікірі жарияланған екен. Кейбіреулер соны өздерінің теріс мақсаттарына пайдаланғысы келеді. Журналдағы отызға таяу автордың ішінен бір адамның ғана жеке пікірін жұлып алып, бүкіл журналдың антифашистік мазмұнын жоққа шығаруға бола ма екен?! Оның өзінде де Есмырзаның Гитлерді «фашист емес» деп «ақтап алуға» тырысуы оның да фашизмге қарсы екендігін, яғни, бұл жағдай тұтасынан алғанда журналдың түгел антифашистік рухтағы материалдардан құрастырылғандығын дәлелдейді.
Қазақстандағы ресейшіл топтардың тілге тиек етіп отырған екінші сылтауы – «Гитлер мен Путиннің іс-әрекетінде ұқсастық бар ма?» деген сұраққа профессорлар Сайын Борбасов пен Зардыхан Қинаятұлының, белгілі саясаттанушы-ғалым Расул Жұмалының берген оң пікірлері. Алайда, мұндай ұқсастықтар туралы көптеген пікірлер бұған дейін-ақ ең жоғары халықаралық деңгейде, мәселен, АҚШ-тың бұрынғы мемлекеттік хатшысы Хиллари Клинтонның, Германияның қаржы министрі Вольфганг Шойбленің, Чех Республикасының парламент депутаты Шварценбергтің, Мәскеулік тарихшы-профессор Андрей Зубовтың, тағы да басқа белгілі тұлғалардың сөздерінде, Украинаның «Шустер Live» бағдарламасында ашық айтылған болатын.
Ал, журналдың Гитлер мен Путинді салыстырғандағы басты мақсаты – «орыс жерлерін қайтару» үшін өзінің реваншистік жорықтарына кірісіп, бүкіл әлемнің көзінше тәуелсіз Украинаға басқыншылық жасаған және Қырымды тартып алған бүгінгі Ресейді өткен ғасырдың 30-шы жылдарындағы «неміс жерлерін қайтарушы» гитлерлік Германияның ізімен алып бара жатқан Путиннің өте қауіпті саясатынан сақтандыру. Ал, қазір Лимонов, Жириновский, Штыгашевтердің аузымен қазақ жерлеріне де көз аларту ашықтан-ашық жүріп жатқанын ескерсек, мұның өте дер кезінде және орынды жасалған сақтандыру екендігін ешкім жоққа шығара алмайды.
Сондай-ақ, журнал мұқабасындағы фюрердің фотосуретіне келер болсақ, журналдың нақты санының мұқабасына оның басты кейіпкерінің фотосуретін басу – барлық сандарға ортақ тәртіп. Және ол үшін әр кезде түрлі басылымдарда жарияланған фотобейнелер пайдаланылады. Ал, «Қазақстан Республикасының бұқаралық ақпарат құралдары туралы Заңының» 26-бабы бойынша бұрын жарияланған материалдарды қайталап басқаны үшін ақпарат құралы кінәлі болып табылмайды.
Жоғарыда айтылған жағдайларды қорытындылай келе біздер, төменде қол қоюшы азаматтар, «Жұлдыздар отбасы АҢЫЗ АДАМ» журналының биылғы сәуір айында жарық көрген №8 санында әлеуметтік және ұлтаралық араздық, еларалық дау тудыратындай идея мен мазмұнның, қандай да бір заңбұзушылықтың жоқтығына кепілдік береміз. Бұған сенімсіздік білдірушілер табылып жатса, журналды орысшаға аударсын да, оқып көрсін.
Қадірлі Нұрсұлтан Әбішұлы! Сіз Қазақстан Республикасының Президенті – Елбасы ретінде Конституция бойынша жеке адамның құқықтары мен бостандықтарының кепілі болып табылатындықтан, біздер Сізден «Жұлдыздар отбасы АҢЫЗ АДАМ» журналы мен оның бас редакторы – Жарылқап Қалыбайға қатысты орын алған арандатушылық әрекеттерге өз тарапыңыздан тосқауыл қоюыңызды өтінеміз және біздің бұл өтінішімізді Сіздің түсіністікпен қабыл алатыныңызға сенеміз.
Құрметпен,
Қалмұхан ИСАБАЕВ, жазушы, Ұлы Отан cоғысының ардагері
Асанәлі ӘШІМОВ, КСРО және Қазақстанның Халық әртісі
Мұхтар ШАХАНОВ, ақын, Қазақстанның Халық жазушысы
Қабдеш ЖҰМАДІЛ, Қазақстанның Халық жазушысы
Мырзагелді КЕМЕЛ, экономика ғылымдарының докторы, қоғам қайраткері
Дулат ИСАБЕКОВ, Қазақстанның Халық жазушысы
Рахымжан ОТАРБАЕВ, жазушы-драматург,
ҚР еңбек сіңірген қайраткері
Бексұлтан НҰРЖЕКЕҰЛЫ, жазушы
Темірхан МЕДЕТБЕК, ақын, Мемлекеттік сыйлықтың лауреаты
Жасарал ҚУАНЫШӘЛИН, саясаткер, қоғам қайраткері
Дос КӨШІМ, саясаттанушы, «Ұлт тағдыры» қозғалысының жетекшісі
Серік ТҰРҒЫНБЕКОВ, ақын
Исраил САПАРБАЙ, ақын
Жұмаш КЕНЕБАЙ, ақын
Айгүл ІСМАҚОВА, филология ғылымдарының докторы,
профессор
Болат ӘБДІЛМАНОВ, актер, ҚР еңбек сіңірген мәдениет қайраткері
Рамазан СТАМҒАЗИЕВ, әнші, ҚР еңбек сіңірген әртісі
Ерғали ӘБДІРАЙЫМОВ, «Жігіттер» квартетінің продюсері және т.б. қоғам қайраткерлері қол қойған.
(Қол қою жалғасуда)
