Халықаралық жиын «Көршінің отына өшіккен, өз сақалын өртейді», деген қазақ нақылымен ашылды. Қазақтың астарлы сөзін Шанхайға жиылған бірнеше мемлекеттің басшылары мен саясаткерлері бүгін Қытай Төрағасы Си Цзиньпиннің аузынан естіді. Мәртебелі де маңызды саммиттің бұлайша басталуы заңды да, өйткені, Азиялық кеңесті құру идеясын осыдан 22 жыл бұрын біздің Президент Нұрсұлтан Назарбаев көтерген еді. Азиядағы өзара іс-қимыл және сенім шаралары 4 жылғы кеңесінің төрағасы Түркия еді, енді Қытай Халық Республикасы қабылдап отыр. Жиында сөз сөйлеген Қазақ Президенті жаһан құндылықтарының жылдам өзгеріп бара жатқанын айтты. Төзімсіздік, агрессия, терроризм мен экстремизм, бір сөзбен айтқанда, бұрын бұғып жатқан қауіптер жылдам бас көтеріп, бірден-бірге таралып барады. Нұрсұлтан Назарбаев, Қазақстан Республикасының Президенті: Жаһан осыдан 6 жыл бұрын тап болған дағдарыс ешқайда ұшып кеткен жоқ, қайта тереңдеп барады. Бір саладан екінші салаға өтіп жатыр, қаржылық, экономикалық, саяси-әлеуметтік, тіпті мәдени-рухани салаларға ауысып барады. Бұл дағдарыс — бейбітшілікті дамытудың көне тәсілінен қалған барлық тараптың дағдарысы. Бұл дағдарыс — жүйелі түрге көшкен тұтас өркениеттің дағдарысы. Сондықтан, бізге, Азия мемлекеттеріне континентті бейбіт түрде дамытумен өзіміз айналысуымыз керек. Бұл мәселеде «Азиядағы қауіпсіздік және даму» ұйымы маңызды құрал бола алады. Осы кеңеске мүше мемлекеттердің көшбасшыларын бұл ұсынысты кері шегермей, жұмыс істеуге шақырамын.
Еркін ТАҢАТҚАНҰЛЫ
www.kaztrk.kz