ҚазАқпарат — Белгілі археолог, тарих ғылымдарының докторы Зейнолла Самашевтің жетекшілігімен жүргізілген Алтайдағы археологиялық қазба жұмыстары барысында шамамен VII ғасырда өмір сүрген 40 жастағы сарбаздың сүйегі табылды. Бұл туралы Түркі академиясының баспасөз қызметінен хабарланды.«Жауынгердің денесінің қасынан VII ғасырға тиесілі қару-жарағы атап айтқанда, дулыға, садақ, жебе, қорамсақ, қылыш сонымен қатар, аттың сүйектері мен алтын жалатылған ер-тұрман, жүген табылды. Сондай-ақ, сарбаздың қасына қобызға ұқсас музыкалық аспаптың қойылуы археологиялық қазба жұмысының басты жаңалығы болып отыр», — делінген баспасөз баянында.
Ескерткіш Түркі Академиясының «Батыс Түрік қағанатының мемлекеттік құрылымы» атты ғылыми-зерттеу жобасы негізінде қазылған. Бұған дейін «Берел» қорымынан мол жәдігер тапқан белгілі археолог Зейнолла Самашев археолог ғалымдармен бірге жүргізілген алғашқы сараптамалар нәтижесі жауынгерді шамамен VII ғасырда өмір сүрген деп болжап отыр.
«Адам мен аттың сүйегі өте жақсы сақталған. Бұл сүйек — қатардағы сарбаздікі емес, жырау немесе қоғамда жоғары мәртебеге ие болған адамдікі болуы кәдік», — дейді ол.
Бір қызығы, дәл осы өңірден былтыр аталған ғалымның археологиялық тобы екі көне аспап түрін тапқан болатын. Тарихи олжаның нақты дәуірі Түркі академиясы жанында жүргізілетін арнайы сараптамалардан кейін анықталады.
Автор: Қанат Мәметқазыұлы
