АЛМАТЫ. ҚазАқпарат — Теңгенің нығаюына қажетті кеңістік туып отыр. ҚР Ұлттық банкі теңгенің бағамының +/-3 дәлізін кеңейтуді жоспарлап отыр. Бұл туралы ҚР Ұлттық банкінің төрағасы Қайрат Келімбетов бүгін Алматыда өткен ІҮ Ислам қаржыландыру конференциясы барысында мәлім етті.«Теңге бағамының 185 теңгеден +/-3 дәлізі Ресей рублінің 40-42 бағамына шаққанда өте шыдамды болып отыр. Тамыздағы қорытындыға сәйкес еліміздің алтын-валюталық ресурстары 27,7 млрд. теңгеге өсті. Бірақ кейбіреулер неге екені белгісіз, шығын көп деп жатыр. Қазір теңгенің нығаюына қажетті кеңістік туып отыр. Соның ішінде біз +/-3 дәлізін кеңейтуді жоспарлап отырмыз. Ол 185 бағамынан +3, -15 болады. Одан әрі 181,180, 179 бағамдарының ауылы алыс емес. Біз оны осы аптаның ішінде жүзеге асырмақпыз», — деді Қ.Келімбетов.
Бүгінгі конференция барысында Қайрат Келімбетов ислам қаржыландыру жүйесін дамыту үшін үш негізгі бағытты белгіледі. Оның ойынша, Қазақстанда адам капиталы, заңнаманы жетілдіру, ислам қаржылық қызметтерін енгізу үшін инфрақұрылым жасау, маркетинг пен ислам қаржыландыру нарығының қатысушыларын тарту Қазақстандағы исламдық қаржыландыру жүйесін нығайта түспек.
Ол сонымен қатар қаржы нарығы қатысушыларының ұсыныс-пікірлерін исламдық қаржыландыруды дамытудың 2020 жылға дейінгі жол картасына енгізуді ұсынды.
«Қазақстан исламдық қаржыландыру жүйесінің алғашқы кезеңінде болса да, мұнда көп жұмыс жасалды. Мәселен, исламдық қаржыландыруды дамытудың 2020 жылға дейінгі жол картасы қабылданды. Мұнда белгілі Ислам банкі — Al Hilal Bank өзінің бөлімшесін ашты», — деді банкир.
