BAQ.KZ – Әйгілі француз генералы, бүгінгі Францияның негізін қалаушы және бірінші Президенті Шарль де Голльдің кезінде Қазақстанға келгенін біреу білсе, біреу білмес.
Көпшілікке беймәлім бұл оқиға 1966 жылы болған. Сол жылдың 25-26 маусымында Шарль де Голь Франция Республикасының сыртқы істер министрі Кув де Мюрвильмен бірге Қазақстан аумағындағы «Байқоңыр» ғарыш айлағында болып, кешеннің жұмысымен танысқан. Бір атап өтерлігі, Шарль де Голь – аталмыш кешенді көрген тұңғыш шетелдік мейман.
Қазақ-француз қарым-қатынасының тарихи тереңдігін айқындайтын бұл мәліметтермен бүгін Франция Республикасының Қазақстандағы Төтенше және өкілетті елшісі Франсис Этьен бөлісті.
— Шарль де Голь Астанада болмаса да, Қазақстанды өз көзімен көрген. Ал енді елдеріміз арасындағы қарым-қатынастың жыл санап нығайып жатқан кезеңінде барша француз халқының ұлы тұлғасына Қазақстанның бас қаласында ескерткіштің ашылғаны – аса мағыналы шара, — деді елші.
Бұдан бұрын хабарлағанымыздай, бүгін Астана әкімі Әділбек Жақсыбеков пен Франция Республикасының Қазақстандағы Төтенше және өкілетті елшісі Франсис Этьен француз генералы, Бесінші Республиканың негізін қалаушы және бірінші Президенті Шарль де Гольге арналған ескерткішті салтанатты түрде ашты.