Алматы әкімі Дархан Сатыбалды инвесторлар алдындағы әкімшілік кедергілерді жою мәселесі бойынша кеңес өткізді.Жиында Өңірлік инвестициялық штаб мақұлдаған инвестициялық жобалар және оларды жүзеге асыру барысында туындайтын мәселелер қаралды. Атап айтқанда, жер учаскелерін рәсімдеу, сәулет және қала құрылысы рәсімдерінен өту, сондай-ақ инженерлік желілерге қосылуға басымдық берілді.
Дархан Сатыбалды мемлекеттік органдарға туындаған мәселелерді жедел шешуді, әрбір жоба бойынша жауапты тұлғалар мен нақты мерзімді айқындауды, сондай-ақ қабылданған шешімдердің орындалуын бақылауды күшейтуді тапсырды.
Сондай-ақ, инвестициялық жобаларды қолдауға арналған цифрлық платформаның жұмысы талқыланды. Оны одан әрі енгізу, оның ішінде қаладағы әлеуметтік және стратегиялық нысандарды қолдау бағытында жалғасын табады.
Бұл жұмыс әкімшілік кедергілерді жедел жоюға, сондай-ақ Алматыда жаңа жобаларды жүзеге асыруға, өндірісті, инфрақұрылымды, туризм мен қызмет көрсету саласын дамытуға қолайлы жағдай жасауға мүмкіндік береді.
Алматы қаласының әкімдігі facebook парақшасынан алынды