Ахмет Аляз, Қазақстан-Түркия іскер адамдар қоғамының бас хатшысы:
– Бұл мәселе өте орынды деп санаймын. Олардың арасында да небір дарынды, алғыр, талантты жастар көп. Соларды тауып, қолдау жасап, шетелдің мықты жоғары оқу орындарында оқытып жатса, нұр үстіне нұр болар еді. Әрине, «Болашақ» бағдарламасы арқылы оқысын, бірақ бітірген соң Қазақстанда 5 жыл немесе шартта көрсетілген кезеңде жұмыс істейсің» деген қатаң талап болуы тиіс. Өйткені «алмақтың да салмағы бар».
Шетелде алған білімінің нәтижесін өз Отанында көрсеткен дұрыс. Яғни Қазақстанның өркендеуіне, дамуына үлес қосуы тиіс.
Меніңше, бұл бастама алдағы уақытта қолдау табады деп ойлаймын.
Кәрімбек ҚҰРМАНӘЛИЕВ, филология ғылымдарының докторы, профессор:
– Өзінің тарихи Отанынан кезінде тағдырдың талайымен алыстап кеткен ағайындардың арасында білімді де білікті азаматтар жеткілікті. Сондай жастарды өзімізге тарту үшін «Болашақ» бағдарламасы арқылы квота бөліп, оқытып, өз елімізде қызмет беріп жатсақ, жаман ба? Олар да Қазақстанның дамуына үлесін қосудан аянбас еді. Бірақ мұның бәрін заң аясында шешу керек.
Қандастарымыз тұратын мемлекеттермен халықаралық келісімшарттар шеңберінде келісе отырып атқарған жөн. Меніңше, бұл жерде сол мемлекеттерде жұмыс істеп жатқан елшілеріміз талантты жастарымызды тауып, бағыт-бағдар бергені жөн. Осылайша, «Болашақ» бағдарламасымен сыртта жүрген қандастарымыздың да қамын жеген дұрыс.
Дос КӨШІМ, «Ұлт тағдыры» қоғамдық қозғалысының төрағасы:
– Мұндай бастамаға тек оң көзбен қарау керек. Қуана қолдау қажет. Неге десең, олар да өз қандастарымыз.
Тіпті оларды осы бағдарлама аясында оқытып, «біз қаржы төледік» деп бұлдап, елге шақырудың қажеті де жоқ. Ол азаматтар ешуақытта Қазақстанның көмегін қай жерде жүрсе де ұмытпайды. Осындай атамекеніміз бар, тарихи Отанымыз бар, арқа сүйер, қажет кезінде қол ұшын созар еліміз бар деп еске алып, айта жүреді. Бұл еліміздің қандастар алдында да, өзгелер алдында да беделін көтерер еді.
aikyn.kz