Қызылордада Абылай ханның 300 жылдығына арналған айтыс өтті. Бұл туралы «Сыр бойы» газетінің сайты былай деп жазады. Үш жүздің ардаларын бір тудың астына жинап, қазақ халқының тәуелсіздігі мен бірлігі үшін жауларымен күресіп өткен дана қолбасшы, Абылай ханның 300 жылдығына орай облыстық мәдениет басқармасының халық шығармашылығы орталығы ақындар айтысын ұйымдастырды.
Айтысқа елімізге есімі танымал айтыскерлер қатысты.
Қазақтың ұлттық ұстынын, кеше мен бүгіннің келбетін жыр кестесіне салып, домбыра шанағынан шашу қылған ақындар сөз жанкүйерлерін риза қылды. Олардың орамды да, ойлы өлең шумақтарына талғамы жоғары қазылар алқасы оң баға берді.
– Сөз өнері арқылы елдің елдігін, рухын көтерген ақындарымыз халық көкейіндегі көксеуді, тәуелсіздіктің тұғырлы бейнесін аша білді, – деді қазылар алқасының төрағасы ақын Шәкизада Әбдікәрімов.
Сонымен бірге, ақындар көрермен көңілін көтеретін әдемі сөз айшықтарымен де есте қалды.
«Емеспін жұрт білетін шешен бала,
Ақын деп мойындайтын көшем ғана.
Мені жақсы танитын екі адам бар,
Оның өзі әкем мен шешем ғана» – деп жұртты бір желпінткен шиелілік Ержан Әміров осы айтыстағы ашылған тағы бір талант иесі деп танылды. Оған қазылар Асқар Кіребаев атындағы арнайы сыйлықты тиесілі деп тапты.
Бұл жолы Ержанның жерлесі, белгілі сөз жүйрігі Мейірбек Сұлтанхан қазылар талғамынан шықпады. Қарсыласына орынды уәж қайтара алған жоқ. Сондай-ақ, танымал айтыскер Сара Тоқтамысова да өз биігінен көріне алмады. Айтыскерлердің көбіне ортақ кемшілік жаттандылық болды. Бұрынғы айтыстарын қайталаған Сараға сарапшылар осы тұрғыдан сараңдық танытты.
Қорытындыда астаналық қос ақын С.Тоқтамысова мен Еркебұлан Қайназаров 3-ші, оңтүстіктік Біржан Байтуов 2-ші, жерлесіміз Мұқтар Ниязов 1-ші, ал, Нұрмат Мансұров 500 мың теңгелік бас бәйгені олжалады.
Осылайша Абылай ханның тұлғасын тағы бір асқақтатып, домбыра шанағынан даналық сөз төккен айтыс өтті.
Дүйсенбек АЯШҰЛЫ
kazaitys.kz